Te Motupaika V-1000 o Britten
O nga whainga maha tonu a John Britten, ko etahi e rua i parekareka ki a ia, ko te hanga me te rawekeweke mihini, me te eke motupaika whakataetae. Ko te whakatinanatanga o enei, ko te motupaika V-1000 i hoahoatia, i hangaia e ia i tana kainga tonu. Ka timata mai i te paku whakarereke haere i tana Ducati, engari i te mutunga ake, kua tu mai ko tetahi motupaika hou katoa hei whakamiharotanga ma te ao hanga motupaika, tae atu ki a Ducati tonu.
Tata tonu ka pau te tekau ma rua tau ki te hanga i tenei motupaika. Ka uru atu te motupaika nei ki te karangatanga e kiia nei ko nga 'superbike pukaha-rua'. Ko tenei tetahi o nga momo motupaika ka taea tonuhia te hoahoa, te hanga me te taraiwa e te tangata tumataiti.
Ko te tino whainga a te hunga hanga motupaika tauomaoma, kia tere te haere o o ratou motupaika, ara, kia tere te haere i nga wahi atea o te ara, kia tere te huri haere i nga wahi kopikopiko, a, kia kakama ano ina whakaterea ana, ina whakapuhoitia ana ranei te motupaika. Ka aro atu a Britten ki te taha whakahaere o te mihini me te ahua tonu o te hanga e tere ake ai te haere o tana motupaika.
Mo te wahi ki te taha whakahaere, nana ano i hanga tana pukaha, a, ahakoa i whakamahia etahi wahanga mai i etahi atu kaihanga motupaika, ko te nuinga i hangaia i Aotearoa tonu. Ko tetahi ahuatanga hou i whakaurua e ia, ko tetahi rorohiko e kitea ai e pehea mai ana etahi mahinga e ono o tana mihini i te wa e taraiwangia ana te motupaika.
Mo te wahi ki te ahua o te hanga, i matua whai a Britten kia kaua e taumaha te motupaika, a, kia kiato te ahua. I konei ka tahuri ia ki te kaka-waro me te Kevlar hei hanga i te anga, nga wira me te kiri. Ko tetahi ahuatanga hou o tenei motupaika, ko te kore tahuhu hei whakatina i nga wira. Ko ta Britten, he whakakaha ake i te hanga o te pukaha kia kore ai e hiahiatia te tahuhu. Ko te raunga hinu ka herea ki tenei, a, ko te wira o mua ka herea ki te crankcase. Waihoki, ko te whakapongi, kua nekehia ki raro i te wahi noho. Na enei ahuatanga katoa, kua noho raungaiti nga wahanga o te motupaika e kore ai e whakaporeareatia te rere o te hau. Ko te taha aerodynamics tenei ki te reo Pakeha.
Ara ano etahi ahuatanga hou, ko te wahi e herea ai te motupaika ki te ueha o mua. He rite te ahua o tenei ki te 'wishbone' torua, a, na konei i mama ake ai te haere i nga wahi kopikopiko o te ara.
Ina puta tuatahi tenei motupaika i nga papa tuaomaoma o te ao, he hopu ngaro pea te mahi a etahi i a ratou e titiro ana ki tenei motupaika, me te puare o te waha i te kaha whakamiharo. Ko te rereke ai o te ahua, ko te kaha o te motupaika, ka mutu, he uaua te whakapono na te tangata kotahi me ana kaiawhina tokoiti noa iho nei i hoahoa, i hanga, i tetahi whenua iti i Te Moana Nui a Kiwa.
Mai i tera wa, kua tuatahi, kua tata tuatahi ranei tetahi Britten V-1000 i etahi o nga tino papa whakataetae o te ao, pera i era o Daytona, o Assen, me Monza Brands Hatch. I te tau 1995, i tuatahi, i tuarua ano hoki tana motupaika i Te Whakataetae o te Ao e kiia nei ko BEARS. I te tau 1996, ka toa ano te V-1000 a Britten i Te Whakataetae Superbike o Aotearoa.
Mai i te matenga o John Britten i te tau 1995, kua riro ma tana kamupene e whakahaere tana i timata ai, me ta ratou u ki te taumata tiketike i ekea e to ratou motupaika tuatahi, e te Britten V- 1000. Kaore e tere ngaro te ingoa o tenei tangata i te ao hanga motupaika o te ao, me te ao hanga whanui o Aotearoa. Ka noho tonu tana hinengaro auaha me tana matau ki te hanga taonga i runga i te manawa-nui me te putea iti hei whakamaunga atu ma etahi o tatou kua waiho i muri nei.
He Korero Ano
Tera pea ka kitea nga korero e whai ake nei i Te Aka Matua, i Te Papa 4.
- Ansley, Bruce. (1992). Superbiker. New Zealand Listener 134 (2725): 22 June. p 25.
- Carpinter, Bernard. (1995). Genius of the Bike Track. Sunday Star Times 10 September.
- Copland, Tessa. (1993). Entrepreneurial Mind Beats Racing Giants. Prodesign: April/May. pp 39-40
- Craill, Shaun. (1995). Tribute to John Britten. Prodesign: October / November. p 74-75.
- Dew, Rod. (1995). John Britten: man of vision. The Press 6 September.
- McGechan, Andy. (1993). The Kiwi Wonderbike. New Zealand Sport Monthly 14: May. pp 65-66.
- McLauchlan, Mark. (1995). Making Tracks: the dreams and schemes of John Britten. North and South 109: April. pp 58-65.
- Wakefield, Rowan. (1995). John Never Said Goodbye. New Zealand Woman's Weekly: 23 October. pp 14-15.
|
