a John Webber (1751-1793)


I te tau 1776, ka tonoa a John Webber kia haere atu hei ringatoi i te taha o Kapene Hemi Kuki i tana rerenga tuatoru mai ki Te Moana Nui a Kiwa. E 24 tau noa iho tona pakeke, a, ko nga whakaahua i oti i a ia i tenei haere te timatatanga o tana rongonui haere i te ao kowaiwai.

I whanau mai a John Webber i Ranana i te tau 1751. I a ia e tamariki tonu ana, ka tukuna atu ia ki Bern, ki reira whai ai i te matauranga toi. Katahi ia ka haere ki Paris, ki te whawha i te hohonutanga atu o te tuhi whakaahua, me te hanga kowaiwai ki te peita hinu. No te tau 1775 ka hoki ia ki Ranana, a, i te tau o muri mai, ka kitea tetahi o ana whakaahua e Takuta Daniel Solander, tetahi o nga tohunga huaota i whai wahi atu ki te rerenga tuatahi mai a Kapene Hemi Kuki ki Te Moana Nui a Kiwa. Na Solander i whakaaetia ai a Webber hei ringa whakaahua mo te rerenga tuatoru mai a Hemi Kuki.

Ko ta Hemi Kuki i hiahia ai, kia whakaahuatia e Webber nga ahuatanga o nga whenua hou me uaua ka taea te kopaki ki te kupu anake. Ko nga mea katoa o te taiao tena, ko nga tangata whenua tae atu ki a ratou tikanga tena. E ai ki te korero, he tohunga a Webber ki tenei mahi - ka mutu, kaore e arotia e ia te roa ona e mahi ana i te whakaahua kotahi, ko te mea nui ke ki a ia, kia tika te noho mai o nga mea katoa ki ana whakaahua.

I taruatia etahi o ana whakaahua i a ia ka hoki ki Ingarangi, engari ko nga tanga tuarua, i taia ki te wharangi kapa. I whakaritea kia whakaaturia etahi o ana whakaahua o Te Moana Nui a Kiwa ki te matinitini, a, whakamiharo ana te hunga tirotiro i enei whakaahua. Ara atu ano nga mahi a Webber i rongonui ai ia, ko ana whakaahua o Hemi Kuki. Kaore i mutu i konei tana toro haere i whenua ke; i kaha tonu tana haere ki wiwi, ki wawa, ka whakaahua i tana i kite ai.

Ko tetahi atu ahuatanga ona e tika ana kia korerotia, ko tana tiki atu i nga tikanga whakaahua whenua a Claude Lorrain e 'ataahua' ake ai te whakaahua o te taiao, tena i te ahua tuturu. Kei te kitea atu tenei tuahua i tana whakaahua o Ship Cove.

No te tau 1791 ka whakaingoatia ia hei mema tuturu o te Royal Academy. E tohu ana tenei i eke ia ki nga taumata o nga mahi toi i Ingarangi. He tuatahi ano hoki tenei mo nga whakaahua o te takoto mai o whenua ke, o taiao ke; kaore hoki i tino rongonui enei momo whakaahua i Ingarangi i mua atu i tenei.

Kaore e kore he wahanga nui tonu kei tana haere ki Te Moana Nui a Kiwa i rongonui ai ia i roto i nga tau, i te mea ko te kaha tauhou o etahi o nga ahuatanga o whenua ke e noho mai ana ki ana whakaahua, tae atu ki ana whakaahua o Hemi Kuki etahi o nga mea i kaha tonu te whaia e te ao tirotiro whakaahua o taua wa.

I mate mai a Webber i te tau 1793.

He Korero Ano

Tera pea ka kitea etahi o nga tanga korero e whai ake nei i nga pae pukapuka o te Discovery Centre, i Te Aka Matua ranei, i Te Papa 4. Ka taea te tono whakaahua o nga mea e mau mai ana ki nga Kohinga o Te Papa Tongarewa Images, i Te Papa 4.

  • Joppien, Rudiger and Smith, Bernard. (1985-7). The Art of Captain Cook's Voyages. vol. II.Auckland: Oxford University Press.
  • Morris, Susan. (1996). John Webber 1751-1793 in The Dictionary of Art. vol 33. London: Macmillian.
  • Murray-Oliver, Anthony. (1975). Captain Cook's Hawaii as seen by his artists. Wellington: Millwood Press.
  • Smith, Bernard (1984). European vision and the South Pacific. 2nd edition. Sydney: Harper and Row.
  • Smith Bernard. (1992). Imagining the Pacific: in the Wake of the Cook Voyages. New Haven: Yale University Press.


Etahi atu mahi a John Webber kei Te Papa Tongarewa



 

Tetahi whakaahua o John Webber
no te tau 1812
na Johann Daniel Mottet (me te whai i tetahi tauira pakupaku o taua wa)
he mea hoatu te peita hinu ki te koaka
Mai i te Bernisches Historisches Museum, i Berne
Inventory no: 32206