Te kohinga kukarau o Te Papa Tongarewa


Kei roto i te kaupeka huaota o Te Papa Tongarewa, ko tetahi kohinga tipu maroke, a, ko tona 230,000 nga tauira tipu o roto. Katoa nga mea nei, he tipu maroke, ara, he 'kuka'. He nui tonu nga momo tipu o roto, tae atu ki nga tipu whaipua, nga tipu kano tahanga, nga huruhuru whenua, nga tini pukohu me era atu tumomo mea, nga momo hawahawa, me nga pukohu wai. Ko nga tipu mai i nga topito katoa o tenei motu, ahakoa no konei taketake ake, no whenua ke ranei, ka kitea i tenei kohinga. Ara ano etahi tipu kua matatoka me etahi tauira rakau kei te kohinga. Atu i nga tipu e rea ana i Aotearoa, kua whai wahi mai ano hoki etahi o nga rakau o etahi atu whenua o te ao ki te kohinga, heoi ano, ko te nuinga o enei, ko nga tipu mai i nga wahi e tino hangai ana ki tenei whenua, penei i Ahitereiria, i Te Moana-nui-a-Kiwa me Aropi.

Ko nga tauira tino tawhito, ko era i kohia e Joseph Banks raua ko Daniel Solander i te rerenga tuatahi mai a Kapene Kuki i te tau 1769.

I whakaturia te Whare Taonga i te tau 1865, a, mai i tera wa, he nui tonu nga kohinga tumataiti a nga tohunga huaota o Aotearoa kua tau mai hei tapiri ki te kohinga kei te Whare Taonga. Ko etahi o enei tangata o roto i nga tau, ko te Koroneho, ko John Buchanan, ko Leonard Cockayne, ko Thomas Kirk, ko Charles Knight, ko Donald Petrie, me etahi atu. Na enei koha mai i enei momo tangata, neke atu i te 1,000 o nga tauira kei te kohinga, he tauira matamua, ara, ko te tauira tuatahi i ata tirohia e nga matanga i a ratou ka tuhi i te whakamarama tuatahi i puta ki te ao e pa ana ki aua momo tipu hou.

Hei hoa mo nga tauira tipu nei, ara ano etahi kowaiwai e whakaahua ana i te tipu. Ko etahi o nga tangata na ratou enei kowaiwai, ko John Buchanan, ko Fanny E Richardson me E H Featon. Ara ano te maha tonu o nga korero me nga whakaahua i whakarerea mai e nga tohunga huaota me nga kaikohi tipu o mua atu. Kei te taha o enei mea katoa, ko tetahi kohinga pukapuka e pa ana ki te ao huaota.

Whakamahia ai te kohinga kukarau e te tokomaha tonu o nga tangata. Ko etahi, he tohunga huaota, ko etahi he tangata tuhi korero mo nga hitori o Aotearoa, ko etahi kei te kimi whakamarama mo te ahua o tetahi tipu, ko etahi kei te kawe i tetahi kaupapa putaiao, ko etahi ano kei te rangahau i nga korero e pa ana ki tetahi o nga tangata i whai wahi mai ki nga matauranga huaota o Aotearoa i roto i nga tau. He wa ano ka tukuna etahi o nga rauemi o roto i te kohinga ki whenua ke, hei awhina i nga kaupapa huaota e mahia ana i tawahi.

Atu i nga tipu, nga whakaahua me nga pukapuka, ara ano nga kaimahi o te kohinga, a, he awhina ano kei a ratou. Ko etahi o a ratou mahi, he tuku whakamarama ki nga tangata tono awhina i a ratou, he whakarite i nga rauemi mo roto i nga whakaaturanga, tae atu ki te whakahaere akoranga e pa ana ki nga rakau maori o Aotearoa.

E whai wahi atu ana ano hoki nga kaimahi o te kaupeka huaota ki etahi mahi rangahau nui tonu. Ko tetahi, he ata rangahau i nga ahuatanga katoa e pa ana ki etahi tipu, tae atu ki te ata tautuhi i te tipu me te kimi mai i ona whakapapa katoa. Ko tetahi ano, ko te tuhi i nga haurongo mo nga tino ringa huaota o Aotearoa. I enei ra e ono nga kaimahi ukiuki e tiaki ana i te kohinga, otira, he tokomaha ano nga kairangahau.

Mehemea he patai au e pa ana ki te kohinga tipu kei Te Papa Tongarewa, tena koa tukuna mai he korero ki a matou, haere mai ranei ki NatureSpace, te Discovery Centre e pa ana ki te taiao kei te Papa 2 o tenei whare pupuri taonga tongarewa.



 

Te kohinga kukarau o Te Papa Tongarewa
Ko Jeff Fox, te kaiwhakahaere o te kohinga huaota e ata tirotiro ana i tetahi tauira kuka o te kowhai i whakatipuria mai i te kakano
he mea kohi na Banks raua ko Solander
Neg No: E.001889/2 © Museum of New Zealand Te Papa Tongarewa