Te Haerenga Nui a Abel Tasman


I nga tau 1600 he maha nga Uropiana i whakapono kei Te Kopae Tonga tetahi whenua rawhaki, ko te Whenua Nui ki te Tonga te ingoa. I whakapae ratou he nui te koura me te hiriwa kei taua whenua, he whenua hei whakarite i te toimaha o nga whenua rawhaki o te Tokerau.

Rokohanga, i tenei wa kua whiwhi nga Tatimana i te nui rawa mai i te Vereenigde Oost Indische Compagnie (VOC), i mohiotia e nga Ingarihi ko te Dutch East Indies (inaianei ko Initonihia). Ko ia nei te tino kamupene kaipakihi o reira. I te tau 1642 i whakaritea e te Kawana o VOC, e Antony van Diemen kia haere tetahi whakatakanga ki te kimi i te Whenua Nui ki te Tonga.

I hoatu te whakahaere ki a Abel Tasman mana e toro te moana. Ko te mahi mana he 'kimi i etahi whenua nui, he kimi ranei i te ara moana ki nga wahi tino whai rawa, kia riro mai aua rawa hei whakapai ake hei whakapiki ake te tupunga o te kamupene.'(1)

I meatia atu ki a ia me ana kaipuke e rua, kia tere whaka-te-uru ki Mauritius, katahi ka anga whaka-te-tonga kia tutaki ranei ki tetahi whenua, kia tae ranei ki te ahopae 52° , katahi ka anga ki te rawhiti. Ko ia nei te aramoana i whaia e ia, kia tau ratou ki Tahimeinia - Antony van Diemen's Land. I mapingia te tai tonga, i poua ta ratou kara hei kereme i te whenua. Otira ki ta ratou titiro kaore i nui te rawa ki reira, ka wehe atu ratou.

I te 13 Tihema 1642, ka kite a Tasman 'i tetahi whenua nui teitei'. 'I pahu tana pu, a, i muri i te poupoutanga o te ra i whakaterea e ia he kara ma.' Ka whakaritea e ratou ko ana apiha 'kia tere to ratou haere ki uta ...'(2)

Ko nga kupu a Tasman e tohu ana i te Iuropiana tuatahi kia kite i Niu Tireni. Ko taua whenua ko nga maunga teitei i muri o Hokitika i te Tai o Poutini. I ingoatia e ia ko Staten Landt he pohehe nona he wahanga no te Tonga o Amerika. I a ratou e tere atu ana ki te tokerau, i tuhia e tana kaiurungi, e Franz Jacobszoon Vissher te mapi tuatahi o Te Tai o Poutini.

I muri mai, i to ratou taenga ki te Tai o Aorere, ka tutaki ki etahi Maori no Ngati Tumatakokiri. Ka tuhi a Tasman, 'many lights on land and four vessels near the shore 2 of which betook themselves towards us... those from the 2 canoes began to call out to us; in a gruff hollow voice... blew also many times on an instrument which gave sound like the moors' trumpet...'(3)

Ka utua e nga kaihoe ki a ratou pukaea - tena pea kua whakaaro nga Maori he wero i a ratou kia tu he riri. I te ra i muri mai, i whakatata mai a Ngati Tumatakokiri kia kitea atu e Tasman ka tuhia e ia enei korero, 'a vessel of these people having in it 13 men approached our ships to about a cast away, they called out several times...these people were (as far as we could see) of ordinary height but rough in voice and bones, their colour between brown and yellow, had Black hair right on top of the head fastened together... upon which stood a large thick white feather... their clothing was (So it appeared) some of mats, others Cottons, some and almost all the upper body naked...' (4)

E whitu ano nga waka i hoe mai ki te Heemsherck. Ka tonoa he waka ki te whakatupato i era i runga i te Zeehaen. I te hokinga atu i tukia e tetahi o nga waka Maori. E toru nga kaumoana i patua, i mate ano tetahi i muri i tana taotutanga. I papouri a Tasman mo tenei ahuatanga ka ingoatia e ia taua wahi ko Moordenaers Baij - te Whanga Kohuru. I whakaritea e ia e kore ia e whakatata atu ki nga iwi o Staten Landt a muri atu.

Atu i Whanga Kohuru, i tere atu ana kaipuke ki nga tai i waho o Manawatu, i Te Ika a Maui. I hoki mai ki Rangitoto, kaore i kitea e ratou te ara atu i te Moana o Raukawa ki Te Moana Nui a Kiwa. I Kirihimete ratou ki reira katahi ka ahu atu i te tai hauauru ki te tai tokerau. Kaore ratou i kite i te maunga, i a Taranaki, engari i kite ratou i te maunga Karioi i ko atu o Kawhia.

I tae ratou ki Cape Maria van Diemen (he ingoa no te hoa rangatira o te Kawana o te East India Company) i te marama o Hanuere 1643. I mea ratou ki te peka atu ki Great Island i te hunga moutere o Three Kings engari he kino te tai, a, he kaikiri te o nga Maori i reira.

I te wehenga atu i Niu Tireni, i hoki ratou ki Batavia ma Tonga, Whiti, me New Guinea. Kaore i nui rawa te manaaki a ona rangatira i a Tasman, he pouri no ratou kaore i ata takahia kaore i ata tirohia e ia nga whenua i kitea e ia. I mea ratou ma tetahi atu kaitoro aumangea e toro nga whenua hou a muri atu.

He tohutoro

(1) Sharp, A. (1968). The Voyages of Abel Janszoon Tasman. London: Oxford University Press. p 20
(2) Sharp, A. (1968). The Voyages of Abel Janszoon Tasman. London: Oxford University Press. p 116
(3) Sharp, A. (1968). The Voyages of Abel Janszoon Tasman. London: Oxford University Press. p 121
(4) Sharp, A. (1968). The Voyages of Abel Janszoon Tasman. London: Oxford University Press. pp 121-122

He Korero Ano

Ka kitea etahi o nga pukapuka e whai ake nei i te Discovery Centre ranei, i Te Aka Matua ranei, i Te Papa 4. Ka taea te tono mo nga whakaahua a Te Papa Tongarewa i Images i Te Papa 4 ano.
  • Ell, G. (1992). Abel Tasman: In Search of the Great South Land. Auckland: Bush Press.
  • Sharp, A. (1968). The Voyages of Abel Janszoon Tasman. London: Oxford University Press.
  • Simpson, Kenneth A. (1990). Tasman, Abel Janszoon. (1602/03?-1659?) in The Dictionary of New Zealand Biography. Vol. 1. Wellington: Allen & Unwin New Zealand Limited and the Department of Internal Affairs.



 

Te Mapi e tohu ana i te ara o te Haere Nui a Tahimana, Akuhata 1642-Aperira 1643